Circumcision a seal of faith's righteousness — promise covers women and pre-day-eight males (Rom. 4; Lombard)

XIX. Sed quicquid hac de re dicant, vel sentiant adversarii, nos cum Apostolo dicimus circumcisionem fuisse, non remedium aliquod cujus externa applicatione tolleretur statim & aboleretur peccatum originale, sed, ut loquitur Apostolus, Sigillum justitiae fidei, Rom. 4. Itaque verum justitiae medium, & originalis peccati remedium in adultis omnibus, tam viris quam foeminis, fuit fides promissionibus divinis adhibita. Ista vero promissio quam fides accipiebat, & a qua gratia & salus pendebat, erat haec Abrahamo facta, Ero Deus tuus & seminis tui post te; sub quo semine non masculi solum, sed foeminae quoque comprehendebantur. Hujus promissionis virtute, non autem externi alicujus signi, Deus originale peccatum condonabat omnibus infantibus qui ante usum rationis in foedere moriebantur, sive circumcisionem illi accepissent, sive propter sexum muliebrem, aut aetatem immaturam, illam non accepissent. Quod vero cujusque familiae masculis circumcisionis signum imprimebatur, hoc promissionem toti familiae obsignabat, & in masculis foeminae Deo consecrabantur. Et certe quod absque externo sacramento in proprio corpore suscepto potuerint olim servari foeminae sub Veteri Testamento, & etiam masculi ante octavum diem, ex Lombardo poterat discere Bellarminus. Is enim lib. 4. dist. 1. litter. G. docet mulieres olim salutem & justitiam adeptas fuisse per fidem & operationem bonam, vel suam, si adultae erant, vel parentum, si parvulae. Et similiter parvulos ante circumcisionem in fide parentum servatos fuisse, idque Gregorii Papae testimonio confirmat.