Lighter daily sins tolerated in the regenerate without loss of heaven

VII. Porro ex hac peccatorum inter se disparitate & inaequalitate, & aliorum prae aliis levitate, sive gravitate, fit ut Deus cum filiis suis, quos adoptavit in Christo, & Spiritu suo regeneravit, juxta gratiosum foedus Evangelii benigne agens, peccata quaedam leviora in iis eatenus toleret, ut etiamsi non sint sine ejusmodi peccatis, in quae quotidie incurrunt, & in aliquo eorum moriantur, non tamen eos propterea declaret indignos qui in coelum admittantur, & gloriae ac felicitatis aeternae participes fiant. Adeoque peccata talia consistere possunt cum bona conscientia, & munditia cordis, eaque mensura sanctificationis, quam Deus a nobis exigit in hac vita, ut in altera ipso frui, ipsumque videre possimus. Neque ejusmodi peccata ex homine fideli & pio excutiunt conscientiae pacem, & gaudium spiritus, ac remissionis peccatorum ipsius, & salutis aeternae spem atque fiduciam. Cujus generis peccata sunt, exempli gratia, verbum otiosum, risus immoderatus, cogitatio vana, & naevi ac defectus omnes adhaerentes bonorum piorum operibus, in quibus a summa legis exactitudine semper deficiunt.